“Zəkaların mübarizəsi” olimpiadasının regional mərhələsi keçirilib
23 aprel 2025 | 17:17
23 aprel 2025-ci il tarixində Heydər Əliyev Fondu və Elm və Təhsil Nazirliyinin birgə təşkilatçılığı ilə Mingəçevir şəhərində “Zəkaların mübarizəsi” olimpiadasının bilik yarışı üzrə regional mərhələsi təşkil olunub.
Tədbirdə Mingəçevir Şəhər İcra Hakimiyyətinin başçısı İlham İsmayılov çıxış edərək qeyd etdi ki, Ümummilli lider Heydər Əliyev Azərbaycan təhsilinə hər zaman qayğı göstərmişdir. Bu gün də bu diqqət və qayğı Azərbaycan Respublikasının Prezidenti cənab İlham Əliyev və H.Əliyev Fondunun prezidenti Mehriban xanım Əliyeva tərəfindən davam etdirilir. H.Əliyev fondu tərəfindən “Yeniləşən Azərbaycana yeni məktəb” proqramı çərçivəsində yeni məktəblər inşa etdirilir, məktəblərdə əsaslı təmir işləri görülür, məktəblərin maddi-texniki bazasının gücləndirilməsi işləri aparılır. Ümumtəhsil məktəblərinin şagirdləri nəinki respublika səviyyəli olimpiadalarda, eləcə də beynəlxalq olimpiadalarda yüksək nəticələr göstərirlər.Bütün bunlar təhsilə göstərilən diqqət və qayğının bariz nümünəsidir. Şəhər rəhbəri olimpiadada iştirak edən şagirdlərə uğurlar arzuladı.
Yarışda Mərkəzi Aran Regional Təhsil İdarəsinin tabeliyində fəaliyyət göstərən ümumi təhsil müəssisələrinin IX, X və XI sinif şagirdlərindən ibarət 7 komanda iştirak edib. Gərgin və maraqlı atmosferdə baş tutan bilik yarışının yekununda Mingəçevir şəhərini təmsil edən komanda birinci yerə layiq görülərək respublika mərhələsində iştirak hüququ əldə edib.
Qeyd edək ki, “Zəkaların mübarizəsi” olimpiadası şagirdlərin intellektual potensialının aşkara çıxarılması, onların müxtəlif sahələrdə bilik və bacarıqlarının inkişaf etdirilməsi məqsədilə həyata keçirilir. Olimpiada həmçinin iştirakçıların komanda işi, ünsiyyət, liderlik, analitik və məntiqi düşünmə, planlaşdırma eləcə də strategiya qurma bacarıqlarını da stimullaşdırır. Bununla yanaşı, sağlam rəqabət və regionlararası əməkdaşlıq mühitinin formalaşmasına da töhfə verir.
Qeyd etmək istərdik ki, yarış çərçivəsində şagirdlər riyaziyyat, rəqəmsal texnologiyalar, təbiət və humanitar elmlər, intellektual oyunlar, mədəniyyət və incəsənət sahələri üzrə bilik və bacarıqlarını nümayiş etdiriblər.
