Vətən müharibəsi şəhidləri Elmar İbrahimov və Kənan Abdullayevin məzarı ziyarət olundu
16 oktyabr 2023 | 18:07
Vətən müharibəsində cəbhənin Tərtər-Ağdərə istiqamətində döyüşlərdə iştirak edərək Suqovuşan yaşayış məntəqəsinin azad olunması uğrunda şəhid olan Elmar İbrahimov və Kənan Abdullayevin məzarı 16 oktyabr 2023-cü il tarixdə ziyarət olundu. Azərbaycan Respublikasının azadlığı, suverenliyi, ərazi bütövlüyü, torpaqlarımızın müdafiəsi və işğaldan azad olunması uğrunda canını fəda edərək həlak olan şəhidlərimizin ruhuna dualar edildi. Mərasimdə şəhidlərin ailə üzvləri, yaxınları, şəhid ailələri, müharibə əlilləri, Mingəçevir Dövlət Universitetinin müəllim və tələbələri, şəhidlərin döyüş yoldaşları iştirak etdi. Şəhər İcra Hakimiyyətinin əməkdaşı şəhər rəhbəri adından şəhidlərimizin ailələrinə baş sağlığı verdi, şəhidlərimizə Allahdan rəhmət, yaxınlarına səbr dilədi. Tədbir iştirakçıları ərazi bütövlüyümüzün bərpa edilməsi uğrunda şəhid olan qəhrəman oğullarımız haqqında öz fikirlərini ifadə etdilər, ailələrinə səbr dilədilər və məzarları yanında xatirə şəkili çəkdirdilər. Vətən müharibəsinin təntənəsi təkcə işğal altındakı torpaqların yağı düşməndən qurtuluşu deyil, eyni zamanda, Azərbaycan xalqının milli kimliyinin nə qədər yüksək olduğunun bütün dünyaya nümayişidir. Bunun təməlində həmrəylik, milli qürur, ləyaqət və güc dayanır. Biz həm ərazi bütövlüyümüzü, həm ədaləti, həm də milli ləyaqətimizi bərpa etdik. Allah şəhidlərimizə rəhmət etsin.
