Vətən müharibəsi şəhidi Tural Həsənovun ildönümündə məzarı ziyarət olundu
09 dekabr 2022 | 14:26
Vətən torpaq uğrunda canından keçən, həyatını qurban verən şəhidlərimizin ruhlarına hörmət və ehtiram əlaməti olaraq onların məzarları insanlar tərəfindən ziyarət olunur, xatirələri əziz tutulur. 09.12.2022-ci il tarixində Vətən müharibəsində cəbhənin Tərtər-Ağdərə istiqamətində Suqovuşan yaşayış məntəqəsinin, Talış kəndinin azad olunması uğrunda gedən döyüşlərdə iştirak etmiş və Ağuçuq yüksəkliyinin düşməndən alınması zamanı şəhid olmuş Tural Həsənovun məzarı ziyarət olundu, şəhidlərimizin ruhlarına dualar edildi, ailələrinə səbr diləndi. Tədbirdə şəhidin ailə üzvləri,yaxınları, şəhid ailələri, müharibə əlilləri, YAP şəhər təşkilatının sədri əvəzi Bəxtiyar Mustafayev, Səfərbərlik və Hərbi Xidmətə Çağırış üzrə Dövlət Xidmətinin Mingəçevir şəhər şöbəsinin əməkdaşları, Şəhər Mərkəzi Xəstəxanasının kollektivi, məktəblilər və digər ziyarətə gələn insanlar iştirak etdi. Şəhər İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin böyük məsləhətçisi Seymur Hidayətov şəhər İcra Hakimiyyəti Başçısı adından ailəyə baş sağlığı verdi, şəhidlərimizə Allahdan rəhmət və ailələrinə səbr dilədi, şəhidimiz döyüş yolundan danışdı. 3-cü dərəcəli Vətən müharibəsi əlili Pərviz Məmmədov müharibə əlilləri adından şəhidin anasına səbr və dözüm dilədi. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti İlham Əliyevin müvafiq Sərəncamına əsasən Tural Həsənov (ölümündən sonra) "Vətən uğrunda" medalı, "Suqovuşanın azad olunmasına görə" medalı, "Cəsur döyüşçü" medalı ilə və 05.11.2022-ci il tarixli sərəncamı ilə 3-cü dərəcəli “Vətənə xidmətə görə” ordeni ilə təltif edilib. Allah şəhidlərimizə rəhmət eləsin.
