Ulu öndər Heydər Əliyevin anadan olmasının 100 illiyi münasibəti ilə Mingəçevirdə daha bir ağacəkmə aksiyası keçirildi.
07 mart 2023 | 16:00
Mingəçevir şəhər İcra Hakimiyyətinin tədbirlər planına uyğun olaraq Ulu öndər Heydər Əliyevin anadan olmasının 100 illiyi münasibəti ilə şəhərimizdə ağacəkmə aksiyası davam etməkdədir. Növbəti aksiya mart ayının 7-də Azərbaycan İES yaşayış massivi ərazisində keçirilmişdir. Təbriz küçəsindəki Azərbaycan İES yaşayış massivinə keçid körpüsü ətrafında salınmış yaşıl zonaya yeni əlavələr edildi. Mənzil Kommunal Təsərrüfatı Kombinatı kollektivinin bilavasitə yaxından iştirakı və dəstəyi ilə həyata keçirilən tədbir iştirakçılarda xoş ovqat oyatdı. Təxminən 150-yə yaxın eldar şamı, küknar və çinar tinglərinin əkilməsi baş tutdu. Mənzil Kommunal Təsərrüfatı Kombinatının direktoru Vidadi Şərifov və ərazidə xidmət göstərən MİS-lərin rəhbərləri onlara tapşırılan işlərin öhdəsindən layiqincə gəlməyə çalışmışlar. Belə ki, ağacların əkilməsi üçün ərazi qaydaya salınmış, çalalar qazılmış, su xətləri çəkilmişdir. Tədbirdə Mingəçevir şəhər İcra Hakimiyyətinin məsul əməkdaşları, YAP şəhər təşkilatının sədri Bəxtiyar Mustafayev və partiya üzvləri, 8 saylı ərazi Ekologiya İdarəsinin rəisi Tofiq Əsgərov və ekologiya fəalları, idarə, müəssisə və təşkilatların rəhbərləri, şəhər ictimaiyyətinin nümayəndələri, mətbuat işçiləri, könüllülər iştirak edirdilər.
