Şəhid Rzayev Tərlan Pərviz oğlunun 40 mərasimində məzarı ziyarət olundu
28 oktyabr 2022 | 09:53
Bu ilin sentyabr ayının 12-13 tarixində Ermənistan silahlı qüvvələrinin Azərbaycanın Kəlbəcər, Laçın, Daşkəsən və Zəngilan rayonları istiqamətində törətdiyi genişmiqyaslı təxribatlar bir daha bütün dünyaya göstərdi ki, ermənilər öz işğalçı niyyətlərindən əl çəkmir. Təxribatların qarşısının alınması zamanı şəhid olan Azərbaycan Silahlı Qüvvələrində müddətli hərbi xidmət keçən əsgər Rzayev Tərlan Pərviz oğlunun 40 mərasimində məzarı ziyarət olundu ruhuna dualar oxundu. Mərasimdə şəhidin ailə üzvləri, yaxın qohumları, şəhər İcra Hakimiyyətinin vətən müharibəsi iştirakçıları və şəhid ailələri ilə işin təşkili şöbəsinin müdiri Sahib Əliyev, vətən müharibəsi əlilləri, ilahiyatçılar və digər ziyarətə gələn insanlar iştirak etdilər. Mərasim şəhidin ailəsinin yaşadığı ünvanda şəhər İcra Hakimiyyəti başçısı İlham İsmayılovun, rəhbər şəxslərin, idarə və müəssisə rəhbərlərinin iştirakı ilə davam etdi. Şəhidin ailəsinə baş sağlığı verildi, düşmənin son təxribatı nəticəsində həlak olmuş hərbiçilərimizin ailələrinə səbr diləndi. Təxribatların qarşısını alarkən əsgər və zabitlərimiz öz canlarını doğma torpağımızın müdafiəsi, düşmənin yeni təcavüz planlarına imkan verməmək üçün qurban verdilər. Allah bütün şəhidlərimizə rəhmət eləsin. Vətənini sevən, dövlətinə sadiq qalan, öz vəzifələrini yüksək səviyyədə yerinə yetirən igid oğulların ruhları qarşısında baş əyir, onların doğmalarına Allahdan səbir diləyirik. Onlarla qürur duyuruq. Vətən sağ olsun! Allah şəhidlərimizə rəhmət etsin.
