Mingəçevirdə “”31 dekabr- Dünya Azərbaycanlılarının Həmrəylik Günü” və “Yeni il” bayramları münasibətilə ümumşəhər tədbiri keçirilmişdir.
30 dekabr 2022 | 15:56
Dekabr ayının son günü ərəfəsində Mingəçevirdə Heydər Əliyev Meydanında 31 dekabr- Dünya Azərbaycanlılarının Həmrəylik Günü və Yeni il bayramları münasibətilə ümumşəhər tədbiri keçirilmişdir. Yolka ətrafına toplaşan şəhər sakinləri şən saatlar yaşamışlar. Tədbirdə Mingəçevir şəhər İcra Hakimiyyətinin başçısı İlham İsmayılov, hüquq mühafizə orqanlararının rəhbərləri, ictimaiyyət nümayəndələri, media təmsilçiləri, təhsil, səhiyyə, mədəniyyət işçiləri iştirak ediblər. Bayram tədbiri musiqi sədaları altında davam etmişdir. Mingəçevir şəhər İcra Hakimiyyətinin başçısı İlham İsmayılov tədbirdə geniş nitqlə çıxış etmişdir. O, tədbirə toplaşanlara müraciətlə təbriklərini çatdıraraq demişdir ki: ”31 Dekabr - Dünya Azərbaycanlılarının Həmrəylik Günü və Yeni ili münasibətilə bütün mingəçevirliləri, habelə şəhid ailələrini, övladlarını, qaziləri təbrik edir, hamıya möhkəm can sağlığı, könül xoşluğu, yeni-yeni nailiyyətlər arzulayıram. Bilirsiniz ki, 31 dekabr Dünya Azərbaycanlılarının Həmrəylik Gününün bayram kimi qeyd olunmasının əsası Ulu öndər Heydər Əliyev tərəfindən qoyulmuşdur. Bu gün iftixar hissiylə vurğulayıram ki, Ulu öndərimiz Heydər Əliyevin siyasi kursunu uğurla davam etdirən möhtərəm Prezidentimiz İlham Əliyevin məqsədyönlü və sərrast rəhbərlik fəaliyyəti sayəsində 2022-ci ildə də müstəqil Azərbaycan Respublikası bütün sahələrdə yüksək göstəricilərə nail olmuş, dünyanın ən stabil ölkələri sırasında yerini möhkəmləndirmişdir. Cənab Prezidentin apardığı düzgün daxili və xarici siyasət nəticəsində ölkəmizin dünya miqyasında nüfuzu daha da yüksəlmişdir. Qazandığımız bu uğurlar Azərbaycanın xoşbəxt gələcəyinin göstəricisi və cənab prezidentimiz İlham Əliyevin böyük zəhmətinin bəhrəsidir. Bildiyiniz kimi 44 günlük Vətən müharibəsində müzəffər Ali Baş Komandan, ölkə Prezidenti cənab ilham Əliyevin rəhbərliyi altında, qəhrəman ordumuzun şücaəti nəticəsində 30 ilə yaxın bir dövrdə işğal altında qalan torpaqlarımız azad edildi, ərazi bütövlüyümüz bərpa olundu. Bu müharibədə şəhidlərimiz və qazilərimiz oldu. Allah bütün şəhidlərimizə rəhmət eləsin, qazilərimizə can sağlığı versin. Bu gün azad olunmuş Qarabağ və şərqi Zəngəzurda abadlıq işləri davam edir. Bölgədə ən müasir tələblərə cavab verən yeni infrastruktur layihələr həyata keçirilir. Dədə-baba yurdlarından didərgin düşmüş insanlar doğma torpaqlarına qayıdırlar. Bütün bunlar cənab Ali Baş Komandanın rəhbərliyi altında müzəffər ordumuzun bizə bəxş etdiyi sevincdir. Bu gün şəhidlərimizin ruhu sevinir. Çünki onların qanı yerdə qalmadı. Yola saldığımız il şəhərimiz üçün uğurlu olmuşdur. Mingəçevirin bu uğurları prezidentimiz cənab İlham Əliyevin xüsusi qayğısı və diqqəti ilə sıx bağlıdır. Şəhərimizdə il ərzində tikinti-quruculuq, abadlıq işləri davam etdirilmiş, yeni parklar salınmış, yollarımız və səkilərimiz asfaltlanmış, Dövlət Proqramına uyğun olaraq su-kanalizasiya, qaz çəkilişi işləri davam etdirilmişdir. Cari ildə şəhərimizdə 51 yaşayış binasının dam örtüyü, fasadları, giriş blokları təmir edilmiş, 4 nümunəvi məhəllə yaradılmış, 5 məhəllədə istirahət guşəsi salınmış, 400-ə yaxın işıqlanma nöqtələri qurulmuş, Bayraq meydanından şərq giriş qapısınadək Heydər Əliyev prospektinin sağ və sol hissəsində “Zəfər” günü naminə istirahət güşəsi yaradılmış, “Günəşli” yaşayış massivində ümumi sahəsi 122 min kvadrat metr olan 25 küçənin asfaltlanması, səki və yolların təmiri işləri aparılmışdır. Əldə edilən bu nailiyyətlərdə hər bir mingəçevirlinin əməyi var və onların qürur hissi keçirməyə, öyünməyə haqqı var. Yeni ilin astanasında dayandığımız bir ərəfədə əminlik hissiylə deyirəm ki, biz təzə ilin ilk günlərindən etibarən apardığımız işləri davam etdirəcək, başladığımız işləri sona çatdıracağıq. İli uğurla başa vuran şəhərimizi yeni ildə daha möhtəşəm yeniliklər, nailiyyətlər gözləyir. Bütün bunlar bizi qarşıdan gələn 2023-cü ildə əzmlə çalışmağa və şəhərimizi gözəlləşdirməyə ruhlandırır. Əminəm ki, birgə səylərimizlə bu işlərin öhdəsindən gələcəyik. Elə bu ovqatla Sizi əziz günlər münasibətilə bir daha təbrik edir, hər bir ailəyə mehribanlıq, xoşbəxtlik, bol ruzi, bərəkət və uğurlu günlər arzulayıram. Qoy 2023-cü il həyatımızda daha böyük uğurlar ili olsun. Bayramınız mübarək! “ Tədbir şəhər mədəniyyət işçilərinin təqdim etdiyi geniş konsert proqramı, Uşaq Gənclər İnkişaf Mərkəzinin kollektivinin çıxışları, rəqsləri ilə davam etmişdir. Şaxta Baba və Qar qızın gəlişi isə tədbir iştirakçılarının sevincinə səbəb olmuşdur. Tədbirdə bir qrup şəhid və qazi övladlarına yeni il hədiyyələri təqdim olunmuşdur.
