Mingəçevir şəhər İcra Hakimiyyətinin başçısı İlham İsmayılovun sakinlərlə növbəti səyyar qəbulu oktyabrın 1-də keçirilib.
02 oktyabr 2026 | 10:14
9 nömrəli tam orta məktəbdə keçirilən görüşdə İcra başçısı aparatının məsul əməkdaşları, polis şöbəsinin rəisi, şəhər Bələdiyyəsinin sədri, idarə və müəssisələrin rəhbərləri, sakinlər, mətbuat işçiləri iştirak ediblər.
Görüşü açan İlham İsmayılov şəhərdə həyata keçirilən abadllq işlərindən danışıb. Vətəndaşların məşğulluğunun diqqət mərkəzində olduğunu bildirərək sentyabrın 26-da cənab Prezident İlham Əliyevin iştirakı ilə Bakıda Konqres Mərkəzində onlayn formatda Mingəçevir Sənaye Parkında "Textile Horizon" MMC-nin "Tekstil Klasteri" layihəsi üzrə istehsal müəssisəsinin təməlqoyma mərasiminin keçirilməsindən söz açaraq bildirib ki, yeni müəssisənin inşa olunaraq istifadəyə verilməsi sayəsində şəhərimizdə yüzlərlə yeni iş yeri yaradılacaq, vətəndaşların sosial-rifah halı yaxşılaşacaqdır.
Çıxış edən sakinlər görülən işlərə görə ölkə Prezidentinə minnətdarlıqlarını bildiriblər. Bəzi ərazilərdə ağacların budanması, yaşıllıqların suvarılması üçün texniki su xəttinin çəkilməsi, işsizlik, səkilərin yerləşdirilməsi və digər məsələlərlə bağlı müraciətlər edilib.
Şəhər rəhbəri müraciətlərlə əlaqədar müvafiq müəssisə rəhbərlərinə qısa müddət ərzində problemləri nəzarətə götürməyi və həll etməyi tapşırıb.
