Mingəçevir şəhər İcra Hakimiyyətinin başçısı İlham İsmayılovun sakinlərlə növbəti səyyar görüşü dekabr ayının 24-də 3 nömrəli tam orta məktəbin akt zalında keçirilib
25 dekabr 2024 | 14:19
Görüşdə məktəbə yaxın olan D.Əliyeva, Vidadi küçələrindən və şəhərin müxtəlif ərazilərindən gələn sakinlər, İcra Hakimiyyətinin başçısı aparatının məsul əməkdaşları, Mingəçevir Bələdiyyəsinin, idarə və müəssisələrin rəhbərləri və təmsilçiləri, ictimaiyyət nümayəndələri, mətbuat işçiləri iştirak ediblər.
Görüşü açan şəhər İcra Hakimiyyətinin başçısı İlham İsmayılov ilin əvvəlindən başlanan abadlıq-quruculuq və tikinti işlərinin böyük hissəsinin yekunlaşdığını bildirib. Ölkə Prezidenti cənab İlham Əliyevin tapşırığı ilə həyata keçirilən quruculuq işlərinin vətəndaşların rifah halının yaxşılaşdırılması məqsədi daşıdığını qeyd edib. Vətəndaşların rastlaşdıqları problem və nöqsanların öyrənilməklə həll olunması məqsədi ilə keçirilən səyyar görüşlərin əhəmiyyətini vurğulayaraq qeyd edib ki, kanalizasiya sisteminin yenidən qurulmasının 84 faizi yekunlaşıb. Dövlət Proqramı çərçivəsində çoxmənzilli yaşayış binaları əsaslı təmir olunur, nümunəvi məhəllələr yaradılır, idman meydanları hazırlanır, əyləncə qurğuları quraşdırılır, işıq nöqtələri artırılır, asfaltlanma işlərinə başlanılır. Qarşıdan gələn yeni ildə də İcra Hakimiyyəti tərəfindən tədbirlər planı tərtib olunacaq, ayrı-ayrı küçə və məhəllələrdə quruculuq işlərinin icrası davam etdiriləcəkdir.
İnsanların işlə təminatının diqqət mərkəzində olduğunu vurğulayan şəhər rəhbəri Azərbaycan İES-də yeni stansiyanın tikintisinin böyük hissəsinin başa çatdığını, keçmiş regenerat zavodunun ərazisində yeni sənaye müəssisəsinin inşasının nəzərdə tutulduğunu, MDU-nun yeni Kampusunun tikintisinin davam etdiyini, sahibkar layihələrinin reallaşmasına göstərilən dəstəyin genişləndiyini bildirdi.
Çıxış edən sakinlər şəhərdə həyata keçirilən quruculuq işlərinə görə ölkə prezidentinə minnətdarlıqlarını bildirərək, qarşılaşdıqları problemlərdən danışıblar. Bəzi yataqxana binalarında mövcud olan problemlərdən, zirzəmilərin çirkab su ilə dolu olmasından, bəzi binaların giriş dəhlizlərindəki narahatlıqlardan, dezinfeksiya işlərinin aparılmamasından, işıqlanmanın zəifliyindən, əraziyə yaxın olan məhəllədə binaların əsaslı təmirinə ehtiyac duyulduğundan, binaların qarşısında oturacaq və kölgəliklərin olmamasından, asfalt örtüyünün bərbad vəziyyətindən danışıblar. Xeyir-şər mağarına təmir üçün köməkliyin göstərilməsi və qorumuş ağacların budanmasının vacibliyi də diqqətə çatdırılıb.
Şəhər rəhbəri İlham İsmayılov sakinlərin qaldırdıqları problemlərin həllinə aydınlıq gətirən müəssisə rəhbərlərinə tapşırıqlarını verib. Tədbir iştirakçılarını və onların timsalında ailə üzvlərini qarşıdan gələn Dünya Azərbaycanlılarının Həmrəylik Günü və Yeni İl bayramları münasibəti ilə təbriklərini çatdırıb, ən xoş arzularını dilə gətirib.
