Mingəçevir Dövlət Universitetində elmi-nəzəri konfrans keçirilmişdir

         “Azərbaycan son 18 ildə”
     Dekabrın 22-də Mingəçevir Dövlət Universitetində keçirilən elmi-nəzəri konfrans “Azərbaycan son 18 ildə” mövzusuna həsr olunmuşdu. Konfrans Mingəçevir şəhər İcra Hakimiyyəti və YAP şəhər təşkilatının birgə təşkilatçılığı ilə həyata keçirildi.
Konfransı giriş sözü ilə açan Mingəçevir şəhər İcra Hakimiyyətinin başçısı İlham İsmayılov qeyd etdi ki, 2003-cü il 15 oktyabr seçkilərindən sonra İlham Əliyev  Azərbaycan Respublikasında Prezidentlik fəaliyyətinə başlamışdır. Həmin dövrdən keçən 18 il ərzində Azərbaycanın bütün sahələrində inkişaf və tərəqqi baş vermişdir. 2003-cü il prezident seçkiləri ərəfəsi Ulu öndər səhhəti ilə bağlı öz namizədliyini geri götürəndə xalqa müraciətində onun yarımçıq qalmış bütün işlərini, başa çatmamış arzularını İlham Əliyevin yerinə yetirəcəyinə böyük inamını bildirmişdir.
      Seçkilərdən sonra ölkə Prezidenti seçilən cənab İlham Əliyev “Mən hər bir Azərbaycan vətəndaşının prezidenti olacağam” fikrini bildirmişdir.
      Bu illər ərzində cənab İlham Əliyev Ulu öndərin ölkəmizin inkişafı, xalqın rifahı ilə bağlı arzularını reallığa çevirdi və hər bir Azərbaycan vətəndaşının prezidenti olduğunu reallaşdırdı.
      Ulu öndərin möhkəm təməllər üzərində formalaşdırdığı Azərbaycan dövlətini ən güclü inkişaf mərhələsinə çatdırdı. Azərbaycanda bir zamanlar xəyal kimi görünən qlobal layihələr reallaşdı. Ölkəmiz başdan-başa abadlaşmağa başladı, regionun lider dövləti kimi beynəlxalq nüfuzu yüksəldi. Azərbaycanın səsi mötəbər kürsülərdən, beynəlxalq tədbirlərdən daha qətiyyətlə eşidildi, cəmiyyətimizdə milli birlik təmin edildi.  Döyüş ruhuna, yüksək təchizata, arsenala, innovativ silahlara malik ordu formalaşdı. Bu orduda ləyaqətlə xidmət edən, mərd, vətənpərvər, vətənini canından artıq sevən nəsil yetişdi.  Respublikada yeni bir siyasi mədəniyyət, cəmiyyətdə mili birlik yarandı. Ən əsası Ulu öndər Heydər Əliyevin ən müqəddəs və vacib vəsiyyəti: - işğalda olan torpaqlarımızı azad etmək zəmini, şəraiti yaradıldı və icra edildi.
      Bütün bunlar son 18 ildə ölkə Prezidenti cənab İlham Əliyevin rəhbərliyi altında həyata keçirildi. Azərbaycan dünya miqyasında formalaşmış, inkişaf etmiş bir dövlətə çevrildi.

     Konfransda “Əsası Ümummilli lider tərəfindən qoyulan müasir Azərbaycan dövlətinin inkişafında İlham  Əliyevin  rolu” mövzusunda YAP Mingəçevir Şəhər Təşkilatının sədri Cavanşir Yusubov , “İlham Əliyev – Qurucu rəhbər, xalqa bağlı qalib lider, müzəffər Ali Baş Komandan” mövzusunda 17 saylı tam orta məktəbin direktoru, YAP Şəhər Təşkilatının Şura üzvü Ceyhun Atayev, “İlham Əliyevin Azərbaycanın hərtərəfli inkişafına yönələn yüksəliş strategiyasının əsasları” mövzusunda  Mingəçevir Dövlət Universitetin dosenti, İqtisad üzrə fəlsəfə doktoru Nüşabə Qədimova, “İlham  Əliyev və müstəqil Azərbaycan gəncliyi” mövzusunda Mingəçevir şəhər İcra Hakimiyyətində baş məsləhətçi, YAP Şəhər Təşkilatı İdarə heyətinin üzvü, Gənclər Birliyinin sədri Bəxtiyar Mustafayev çıxış etdilər.
     Çıxışlarda Azərbaycan Respublikasının Prezidenti İlham Əliyevin 18 il ərzində həyata keçirdiyi sosial-iqtisadi islahatlardan, daxili və xarici siyasətdə əldə olunan uğurlardan, ən əsası isə İkinci Vətən müharibəsi zamanı qazanılan zəfərdən söhbət açıldı.
       Konfransın işinə yekun vuran Mingəçevir şəhər İcra Hakimiyyətinin başçısı İlham İsmayılov bildirdi ki, bu gün biz müstəqil Azərbaycan dövlətinin son 18 ildə inkişafı ilə bağlı görülən işlərə dair məruzələri dinlədik. 
Çıxış edənlər ölkə Prezidentinin bir şəxsiyyət kimi fəaliyyətindən, onun Azərbaycan dövləti və xalqı qarşısında geniş xidmətlərindən, bu gün əldə etdiyimiz uğurlarda onun rolundan  bəhs etdilər. Buna görə icazə verin hamımızın adından çıxış edənlərə dərin minnətdarlıq və təşəkkürümüzü bildirək.
       Ulu öndər Heydər Əliyevin memarı olduğu müstəqil Azərbaycan  bu gün onun xəttinin qətiyyətli davamçısı Azərbaycan Prezidenti cənab İlham Əliyevin rəhbərliyi ilə sürətlə inkişaf edir.
Azərbaycanın beynəlxalq aləmdə nüfuzunun günü-gündən artması,  ölkəmizə etibar olunan beynəlxalq tədbirlər, mədəni və idman yarışları ölkə rəhbərinin apardığı düzgün, sərrast siyasətin nəticəsidir.
     Azərbaycan Respublikasının Prezidenti cənab İlham Əliyevin  rəhbərliyi altında  ötən il 30 ilə yaxın bir müddətdə işğal altında olan torpaqlarımız şanlı ordumuzun qalibiyyəti ilə azad olundu, sərhədlərimiz bərpa edildi. 2020-ci il Azərbaycan tarixinə zəfər ili kimi daxil oldu. 44 gün davam edən müharibədə Füzuli, Cəbrayıl, Zəngilan, Qubadlı, Şuşa, Ağdam, Kəlbəcər, Laçın rayonları, Xocavənd və Xocalı rayonlarının bir hissəsi azad olundu. Xocalı, Xankəndi şəhərləri, Xocavənd və Ağdərə rayonlarının bir hissəsi hazırda sülhməramlı qüvvələrin nəzarətindədir. Orada vaxtilə yaşayan soydaşlarımızın həmin ərazilərə qaytarılması üçün işlər gedir. Əminəm ki, ölkə Prezidenti cənab İlham Əliyevin apardığı diplomatik danışıqlar nəticəsində soydaşlarımız öz doğma yurdlarına qayıdacaqlar. İşğal olunmuş ərazilərdə bərpa işlərinə start verilmişdir. 
Artıq deyə bilərik ki, Azərbaycan etibarlı əllərdədir və işıqlı gələcəyi vardır.