Üçrəngli bayrağımız tezliklə Şuşada dalğalanacaq.
Ermənistan işğalçı dövlətdir. İllərdir ki, torpaqlarımıza atəşlər açmaqla insanların rahatlığını pozur, evlərə, inzibati binalara, əkin sahələrinə ziyan vururlar. Düşmən xislətindən əl çəkmir. Sentyabrın 27-də sübh tezdən növbəti təxribatı, həm də silahlı hücumlar edən erməni hərbi birləşmələri yenə sərhəd bölgələrimizdə böyük xəsarət törədib. Azərbaycan xalqı artıq yorulub. Düşmənin dinc durmamasından bəlli olur ki, torpaqlarımızın danışıqlar yolu ilə geri qaytarılması mümkün deyil. Hərbin cavabını hərb yolu ilə, hücumun cavabını əks hücum ilə vermək və daha güclü formada işğalçılara zərbə vurmaq yeganə yoldur. Azərbaycan dövləti illərdir ki, danışıqlar aparır, amma faydası yoxdur. Düşmən işğal etdiyi torpaqları geri qaytarmaq niyyətindən uzaqdır. Bu məqsədlə erməni silahlı qüvvələrinin döyüş aktivliyinin qarşısını almaq, mülki əhalinin təhlükəsizliyini təmin etmək məqsədi ilə Azərbaycan Ordusunun komandanlığı tərəfindən qoşunlarımızın bütün cəbhə boyu əks-hücum əməliyyatı başlaması barədə qərar verilib.
Sentyabrın 27-də düşmən təxribatına Milli Ordumuzun qəhrəman əsgər və zabitləri cəsarətlə cavab verməklə tariximizin növbəti şərəfli səhifəsini yaratdılar. Ordumuzun şəxsi heyəti və tank bölmələri tərəfindən raket-artilleriya qoşunlarının bölmələri, cəbhə aviasiyası və pilotsuz uçuş aparatlarının dəstəyi ilə Ermənistan silahlı qüvvələrinin ön xətdə və müdafiənin dərinliyində yerləşən xeyli sayda canlı qüvvəsi, hərbi obyektləri və döyüş texnikası aşkar edilir və onların hərəkət trayektoriyasına nəzarət aparılır.
Həmin gün həyəcanımız böyük idi. Azərbaycan telekanallarını hadisələr barədə məlumatlanmaq üçün tez-tez dəyişirdik. Bu zaman məlumat verildi ki, Azərbaycan Respublikasının Prezidenti İlham Əliyevin xalqa müraciəti yayımlanacaq. Təbii ki, dövlətimizin başçısı qayğılı baxışları və xalqa inamı, ehtiramını ifadə edən müraciəti ilə bizlərə ruh və inam verdi. Dövlət başçımızın müraciətində düşmənin azğınlıqlarından söz açmaqla xalqı paniklərə uymamağa, təxribatçıların, sosial şəbəkələrdə ara qarışdırmaq məqsədi ilə yalan məlumatlar yayan dələduzlara inanmamağa səslədi. Azərbaycanı sevməyən, Ordumuzun güclənməsini istəməyən, iqtisadiyyatımızın inkişafını, Azərbaycanın dünyaya inteqrasiyasını , insanların həyat tərzinin yaxşılaşmasını, regionların sosial-iqtisadi inkişafını qəbul etmək istəməyən qüvvələr insanların fikirlərini qarışdırmaq üçün yalan məlumatlar yaymağa cəhd göstərirlər. Onlara inanmamalı, cavabları yerindəcə verilməlidir. Biz dövlətimizə, Ordumuza güvənməliyik və güvənirik. Öz işimizdə, fəaliyyətimizdə dəstəyimizi ifadə etməliyik. Belə bir gərgin dövrdə əsgər və zabitlərimizin düşmənlə üz-üzə, ölümün gözünə dik baxaraq əks hücumlar etməklə torpaqlarımızı qoruduqlarını, azad etdiklərini bilə-bilə təxribatçıları dinləməməli, onlara ancaq lənətlər yağdırılmalıdır.
Hadisələri ilk başlayan ermənilərdir. Və bu səbəbdən Ermənistan hökuməti məsuliyyət daşıyır. Ermənistan müxtəlif istiqamətlərdən, Noyemberyan rayonunun Şavarşavan kəndində yerləşən mövqelərdən Qazax rayonu ərazisindəki adsız yüksəkliklərdə yerləşən mövqelərimiz, Krasnoselsk rayonu ərazisindəki adsız yüksəkliklərdəki mövqelərdən isə Gədəbəy rayonunun Zamanlı kəndində və adsız yüksəkliklərdə yerləşən mövqelərimiz atəşə tutulub. Tərtər rayonunun işğal altındakı olan Giləbürt, Ağdam rayonunun Sarıcalı kəndi yaxınlığında, həmçinin Goranboy və Tərtər rayonları ərazisindəki adsız yüksəkliklərdə yerləşən mövqelərdən də ordumuzun mövqeləri atəşə tutulub. Düşmən cavab atəşi ilə susdurulub, bu dəfə ordumuzun cavabı daha sərt və amansız olub. Düşmənə böyük zərbə vurulub.
Hər kəsə bəllidir ki, uzun illərdir siyasi danışıqlar aparılır və nəticəsiz qalır. Azərbaycan xalqı, torpaqlarımız düşmən təcavüzünə məruz qalır. Biz erməni torpağına bir addım belə atmamışıq. Bizim özgə torpağında gözümüz yoxdur. Onlar bizim torpaqlarımızı işğal ediblər, indi də qondarma Dağlıq Qarabağ Respublikası adı altında qeyri-qanuni çıxışlar edir, köç planı qururlar. Azərbaycan dövlətinin tək bir istəyi və tələbi var: Ermənilər torpaqlarımızı qeyd şərtsiz geri qaytarsın, ədalət bərpa olunsun. Lakin sülh məramlı danışıqlar bəhrəsiz qalır. Düşmənə öz əməli, öz dili ilə cavab verilməli, torpaqlarımız işğaldan azad olunmalıdır. Hücuma əks hücum, döyüş, müharibə !
Dünən ilk zəfər xəbərlərini eşitdik. Hamı bir-birinə gözaydınlığı verməyə başladı. Otuz ilə yaxın dövr ərzində torpaqlarımızda dəfələrlə təxribatlar törədən, beynəlxalq qətnamələri icra etməkdən boyun qaçıran ermənilərin cavabı qətiyyətlə, cəsarətlə verilib və verilməkdədir. İşğal altında qalan yaşayış məntəqələrimiz sıra ilə geri alınır. Milli Ordumuzun qəhrəman əsgər və zabitlərinin rəşadəti sayəsində, gecə gündüz sərhədlərimizi qoruyan vətənpərvər övladlarmızın ayıq-sayıqlığı sayəsində Azərbaycan qələbələr əldə edir. Zəfər bizimlədir. Dövlətimizin başçısı, Ali Baş Komandan İlham Əliyevin Ordumuzun şəxsi heyətinə təlqin etdiyi ruh, inam və qətiyyət sayəsində Azərbaycan düşmənin bütün həmlələrini dəf etməklə işğal altında qalan digər torpaqlarımızı da geri qaytaracaq. Xalqımız buna inanır və əmindir ki, qələbə bayrağımız tezliklə Şuşada, digər yurd yerlərimizdə dalğalanacaqdır.
Mirzə Cavadov,
YAP Mingəçevir şəhər təşkilatının Siyasi Şurasının üzvü
