Şəhər İcra Hakimiyyətinin başçısı İlham İsmayılov sakinlərlə növbəti səyyari görüş keçirdi

Mingəçevir şəhər İcra Hakimiyyətinin başçısı İlham İsmayılovun sakinlərlə növbəti səyyar görüşü  Energetiklər qəsəbəsində olub.  Naxçıvan 42,Yadigar Mansurov 11,15,13,9 ünvanında  daha bir nümunəvi məhəllə yaradılıb. Belə ki, qəsəbədəki çoxmənzilli binaların dam örtükləri dəyişdirilib, bloklarda təmir işləri aparılıb, həyətdə uşaq əyləncə mərkəzi yaradılıb, xeyir-şər mağarlarında təmir-bərpa işləri görülüb.
    Görüşü  giriş sözü ilə  açan Mingəçevir şəhər İcra Hakimiyyətinin başçısı İlham İsmayılov   deyib  ki, ölkə Prezidenti İlham Əliyevin tövsiyə və tapşırıqları əsasında indiyə qədər  ayrı-ayrı məhəllələrdə keçirilən səyyar görüşlərdə  sakinlər onları  narahat edən  problemlərdən söz açıblar . Şəhərimizdə aparılan geniş abadlıq və quruculuq işlərindən danışan şəhər rəhbəri  bu işlər bundan sonra da davam etdiriləcək, sizlərin rifah halının yaxşılaşdırılması hər zaman diqqət mərkəzində olacaqdır. Sakinlərdən Rəhim Niftəliyev mənzilində qarşılaşdığı kommunal problemdən danışdı.  Digər sakinlər qəsəbədəki yaşayış binalarına istilik sisteminin çəkilməsi, binaların bloklarının təmiri, poçt şöbəsindəki narahatlıq, bankomatın azlığı, zirzəmilərdəki qrunt sularının yaratdığı antisanitar  hal,  həmçinin Naxçıvan küçəsində yaranan  yol problemi ilə bağlı nöqsanları dilə gətiriblər. Bildirildi  ki, həmin küçədə piyada keçidin və  dayanacaqların olmaması səbəbindən dəfələrlə orada yol nəqliyyat hadisəsi baş verib. Görüşdə  idarə və müəssisə rəhbərləri qaldırılan   problemlərlə bağlı aydınlıq gətiriblər.
    Şəhər rəhbəri qaldırılan məsələlərlə bağlı tapşırıqlarını verib və sakinləri əmin edib ki, problemlər mərhələ-mərhələ öz həllini tapacaq. Bu ilin sonunadək qəsəbədə nümunəvi məhəllələrin sayı artırılacaq.