31 dekabr Dünya Azərbaycanlılarının Həmrəylik Günü və Yeni İl bayramları münasibəti ilə Mingəçevir şəhər İcra Hakimiyyətinin başçısı İlham İsmayılovun Mingəçevirlilərə təbriki
25 dekabr 2024 | 14:35
Hörmətli mingəçevirlilər!
Əziz dostlar!
Ömrümüzə işıq salan, xatirələrə çevrilən daha bir ili, gözəl və mənalı ayları yola salmaq üzrəyik. Bir neçə gündən sonra 2024-cü il tarixə çevriləcək. Qeyd etmək istəyirəm ki, iyirmi bir il bundan əvvəl xalqın etimadı ilə Azərbaycan Respublikasının Prezidenti seçilən dövlətimizin başçısı cənab İlham Əliyevin əməli fəaliyyəti, qətiyyəti və səriştəsi ilə daxili və xarici siyasətimiz yeni məcraya düşmüşdür. Ölkəmiz inkişaf yolunda irəliləməklə yeni-yeni nailiyyətlərə sahib olur, insanların rifah halı durmadan yaxşılaşır. Müstəqilliyimiz yenidən bərpa edildikdən sonra mövcud böhran və çətinliklər aradan qaldırılıb, Azərbaycanın iqtisadi və siyasi inkişaf yolu yeni mərhələyə qədəm qoyur. Sevindirici haldır ki, ötən illər ərzində aparılan məqsədyönlü tədbirlər nəticəsində Azərbaycanın suverenliyi, ərazi bütövlüyü tam bərpa olunmuş, yeraltı, yerüstü sərvətlərimiz öz sahiblərinə qaytarılmışdır. Dörd il əvvəl 44 günlük Vətən müharibəsində vətən övladlarının şücaəti sayəsində azad olunan Qarabağ iqtisadi rayonunda tikinti-quruculuq işləri böyük sürətlə davam etməkdədir. Uzun illər arzusunda olan minlərlə sakin indi artıq yurd-yuvalarına qayıtmaqdadır. Qarabağ iqtisadi zönasında yeni infrastruktur layihələri həyata keçirilir, həyat yenidən bərpa olunur, ölkəmizin bütün bölgələrində tikinti-quruculuq işləri inamla davam edir.
Məhz bunun nəticəsidir ki, Azərbaycana inam artmaqdadır.Uzun illər Azərbaycanın inkişafına şübhə ilə yanaşan bədxahlar bu gün onunla hesablaşır, onun apardığı uğurlu siyasətə dəstək dururlar. 2024-cü ilin noyabr ayında BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının–COP29-un Azərbaycanda keçirilməsi dövlətimizin dünyada nüfuzunun artmasının təcəssümüdür. Qalib ölkənin beynəlxalq tədbirlərə ev sahibliyi etməsi iqtisadi inkişaf sahəsində ölkəmizin daha geniş layihələrdə iştirakının təminatıdır. Azərbaycan Respublikasının Prezidenti cənab İlham Əliyevin müvafiq sərəncamı ilə elan edilən “Yaşıl Dünya Naminə Həmrəylik İli”nə Mingəçevir şəhər sakinlərinin töhfələri böyük olmuşdur. Belə ki, ötən il ərzində şəhərin yaşıllıq zolaqlarında, parklarda, xiyabanlarda, küçə və məhəllələrdə on minlərlə ağac tingləri və dekorativ gül kolları əkilmişdir ki, bu da şəhərin gözəlliyinə xüsusi rənglər qatır.
Əziz dostlar! Başa çatan 2024-cü il mingəçevirlilər üçün uğurlu illərdən biri olub. Cənab Prezident İlham Əliyevin və Birinci Vitse Prezident Mehriban xanım Əliyevanın diqqət və qayğısı sayəsində Mingəçevir inkişaf yolundadır, hüsnünə gözəlliklər əlavə olunur. Azərbaycan İES ərazisində, şəhərin sağ və sol sahillərində, tərəvəzçilik, Mingəçevir kəndi, Bağlar yaşayış massivlərində həyata keçirilən abadlıq-quruculuq və əsaslı təmir işləri vətəndaşlar tərəfindən məmnunluqla qarşılanır. Şəhər İcra Hakimiyyətinə daxil olan müraciətlər, sakinlərlə keçirilən səyyar görüşlərdəki səmimi söhbətlər bunu təsdiq edir. Biz vətəndaşlarla görüşlərimizdə onların qaldırdıqları problemlərin qısa vaxt ərzində yerinə yetirilməsinə nail oluruq. Məqsədimiz vətəndaşların istəklərinə uyğun olaraq onlarda məmnunluq hisslərini artırmaq, yaşam tərzini yaxşılaşdırmaqdır.
2024-cü ildə planlaşdırılan 36 küçə və dalanın və 3 məhəllənin yol-səkilərinin layihə-smeta sənədləri üzrə asfaltlanma işləri aparılır. Mənzil fondunun əsaslı təmiri üzrə nəzərdə tutulan 61 yaşayış binasının təmiri üzrə işlər davam etdirilməkdədir.
Şəhərin müxtəlif ərazilərində 6 (112-ci, 127-ci, 136-cı, 155-ci və Az.İES yaşayış massivində 2 məhəllə) nümunəvi məhəllə təşkil edilmiş və ümumilikdə həmin məhəllələrdə 67 söhbətgah, 285 oturacaq, 3 mini futbol meydançası, 3 idman meydançası, 6 idman qurğuları meydançası qurulmuşdur. Küçə, dalan və məhəllədaxili ərazilərdə küçə işıqlandırılması şəbəkəsi üzrə 600 işıq nöqtəsinin quraşdırılması işləri aparılır.
Cari ildə H.Əliyev Xiyabanının S.Vurgun ilə 20 Yanvar küçələri arasındakı hissəsinin yenidənqurulması işləri aparılmışdır. Layihə əsasında mövcud fəvvarə yenidən qurulmuş, yeni velosiped zolağı salınmış, 500 kv.m qazon səpilmiş, 22 ədəd oturacaq, 15 zibil qabı yenilənmiş, yaşıllıqlar budanmış, 1800 həmişəyaşıl kol əkilmiş, yeni tərtib edilmiş klumbalarda mövsümi 3000 ədəd gül-çiçək əkilmişdir. Sakinlərin asudə vaxtının təşkili üçün stolustu oyunlar üçün stol-stullar quraşdırılmışdır.
Kanalizasiya sisteminin yenidən qurulması prosesinin böyük hissəsi başa çatıb, asfaltlanma işlərinin yekun mərhələlərinin yerinə yetirilməsinə başlanılıb. Sevindirici haldır ki, infrastruktur layihələrinin uğurla icra olunması nəticəsində Mingəçevir şəhərində mavi qazın, suyun, elektrik enerjisinin verilməsində fasilələrə yol verilmir.
Şəhər İcra Hakimiyyətində 2024-cü ilin əvvəlindən tərtib olunan tədbirlər planına müvafiq olaraq aparılan işlər sakinlər tərəfindən rəğbətlə qarşılanır. Qarşıda bizi daha böyük vəzifələr gözləyir. 2025-ci ildə də abadlıq-quruculuq işlərinin yeni məkanlarda davam etdirilməsinə, yaşayış binalarının əsaslı təmirinə, digər ərazilərdə nümunəvi məhəllələrin yaradılmasına, əhalinin istək və arzularına uyğun olaraq iş yerlərinin açılmasına nail olmağa çalışacağıq.
Əminliklə bildirirəm ki, şəhərimizin idarə və müəssisələrinin kollektvlərinin birgə əməkdaşlığı sayəsində üzərimizə düşən vəzifələri layiqincə yerinə yetirəcək, şəhərimizin hüsnünə yeniliklər əlavə edəcəyik. Əziz dostlar! Noyabr ayının 11-də 76 yaşını təntənə ilə qeyd etdiyimiz Mingəçeviri inkişaf etdirib gözəlləşdirmək bizim borcumuzdur. Bu yolda bütün mingəçevirlilərə uğurlar arzulayr, işləriniz avand olsun, deyirəm. Əziz mingəçevirilər və şəhərimizin qonaqları. Sizi 31 dekabr Dünya Azərbaycanlılarının Həmrəylik Günü və Yeni il Bayramları münasibəti ilə ürəkdən təbrik edir, hər birinizə can sağlığı, xoşbəxt ömür yolu və şəhərimizin inkişafı yolundakı fəaliyyət istiqamətində uğurlar arzulayıram. Qoy 2025-ci il həyatımızda daha böyük zəfərlərə yol açsın!
İliniz uğurlu olsun
Bayramınız mübarək!
İlham İSMAYILOV Mingəçevir şəhər İcra Hakimiyyətinin başçısı, siyasi elmlər üzrə fəlsəfə doktoru
